الجزء الأخير – سكرم جلسة الريترو Scrum Retrospectiv

الجزء الاخير بالسكرم
جلسة الريترو
او بالعامي حتى جلسة الصفا
Scrum – Retrospective

بعد ماينتهي السبرينت ويتم تسليمو لاصحاب المشروع, بيكون غالبا الفريق تعبان وبيكون غالبا هالحكي اخر يوم بالاسبوع قبل بساعتين من العطلة

بما انو مافي شخص كامل وبما انو بيصير اخطاء خلال السبرينت, ممكن تكون من المدير , او ممكن من شخص معين, او من اسلوب الشغل السريع, او حتى كتير انو يكون مطور حاسس حالو مظلوم بين زملائو وماحدا عبيعطيه تاسكات او يعبرو

جلسة الريترو بتحل هالمشكلة, الجلسة هي عبارة عن تجمع الفريق مع البرودكت اونر او مايعرف بمالك المشروع (انتبهو مالك المشروع هو مو نفس صاحب المصلحة, مالك المشروع هو كاتب ومنظم القصص)

في اشكال متعددة كيف يتم تنظيم هي الجلسة, ابسط شكل هو
Mad, Sad, Glad
او بالعربي , سعيد , حزين , غاضب

كيف بتصير هي, بيقعد الفريق باجتماع وبيتفقو على مدة معينة متل ١٥ دقيقة , بهي المدة لازم يكتب كل شخص عن كل شي خلاه يكون سعيد , او حزين او غاضب. كل شعور من هي المشاعر لازم يكون على بطاقة منفصلة بيتم وضعها على الحائط

في امثلة كتيرة شو ممكن الشخص يكتب, ممكن حتى عن اشياء كتير عامة متل

انا سعيد لانو مبارح كان الجو حلو
انا حزين لانو المي مقطوعة يومين من المطبخ بالشركة
انا معصب لانو الدنيا شوب

وممكن يكون الموضوع مختص بالامور التقنية اكتر طبعا
انا سعيد لانو خلصنا اصعب قصة بالمشروع
انا سعيد لانو سعيد ساعدني اتعلم node.js
انا معصب لانو سعيد و سعد دائما بيشتغلو مع بعض ومابيخلونا نشتغل معهم
انا معصب لانو الكلاسات كتير سيئة وطويلة ومالها مفهومة

بعد مايخلص الفريق من كتابة كل الاوراق وتعليقها على الحائط, بيتم التصويت على اكتر النقط المهمة حسب رأي الفريق بحيث كل شخص بيحقلو يضع تلت اصوات , وبيقوم الفريق بمناقشتها. واحيانا حتى لو بطاقة فيها صوت واحد بيتم مناقشتها اذا كان في وقت كافي

هي الجلسة تعد من اهم الجلسات, اولا بتخلي الفريق قريب من بعضو وبتعزز الصداقة بين الفريق , وتانيا بيتم حل المشاكل قبل مايصير الموضوع متفاقم ويترك الشخص بدون مايعرف ليش هو معصب او متدايئ

حتى هي الجلسة ممكن تحسن اشياء بالتطوير البرمجي لانو بتيح للفريق يتناقش افكار وحلول ومشاكل برمجية يمكن بوقت التطوير السريع مايحسن يناقشها

هيك من نكون خلصنا الحديث عن السكرم بشكل عام , والمرة القادمة حنحكي عن ادوار الاشخاص بالشركة البرمجية

لميس

إسمي لميس, اعمل كمهندسة برمجيات في شركة إكسينغ في ألمانيا. بدأت في رحلة العمل في المجال البرمجي منذ أكثر من ١٠ سنوات في سنة ٢٠٠٣ كانت بداية رحلتي المهنية حيث كانت بدايتي مع ألعاب الفلاش.. حالياََ انا استخدم العديد من الأدوات البرمجية في العمل فنحن بحاجة ماسة للإطلاع على احدث التقنيات. هدفي هو نقل ما أتعلمه للمشاركة به وتبادل الخبرات مع الجميع

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *