الجزء الرابع – سكرم ولعبة البوكر SCRUM – POKER

سكرم و لعبة البوكر

Scrum – Poker

بالمرة الماضية حكينا عن القصة وانو كيف كل قصة بالسكرم بيتم قياسها بنقاط القصة

مارح ارجع عيد شو يعني قصة لانو مريت عليها مرتين لذلك بفضل اذا انت جديد على الموضوع ترجع مقالة لورا

نقاط القصة او ال Story Points

نقاط القصة وهي لتقييم صعوبة القصة, غالبا السكرم ماستر بيحاول يشرحلك هالشي عن طريق حجم كنزات متل ماذكرنا سابقا

وغالبا السكرم ماستر بيحاول يسهلك العملية تبع التقييم وبيحاول يذكر امثلة مجردة متل

هي الطاولة اديش بتحسن تقيم تركيبها بالنقاط

ممكن فورا الفريق يتفاعل ويقول ٣ نقاط لانو تركيبها سهل

ومن هون بيتابع السكرم ماستر طيب تركيب هالكرسي اديش صعوبتو مقارنة مع الطاولة, ممكن نصل لنتيجة انو الكرسي بدو جهد اكبر وممن يكون في شغلات بدها فهم لذلك ٥

بما انو الفريق عندو خبرات مختلفة عن المشروع وبما انو مو كل الفريق عندو رأي واحد عن القصة اخترعو جماعة السكرم ورق شدة خاص بالسكرم وسموه سكرم بوكر

قبل مايبدأ السبرينت , بيقعد مالك المشروع مع الفريق بجلسة اسمها backlog refinement

بهي الجلسة بيفتح مجموعة قصص وببلش يشرح قصة قصة للفريق واذا في شي تقني ممكن شخص من اشخاص الفريق يشرح عنها اذا كان على معرفة سابقة بالموضوع, بس لتكون القصة مفهومة بيفتو الشباب شدة, لكل شخص من الفريق مجموعة اوراق. وبيقول مالك المشروع كل واحد يسحب رقم من الشدة يلي بايدو اديش بيحس نسبة صعوبة هي القصة

الشباب والصبايا بهالمرحلة بالفريق كل واحد بيسحب ورقة بدون مايورجيها لزملائو وبيقول انا اجاهز, بس الكل يكون جاهزين بيفتحو الكل الورقة
يلي اختاروها على الطاولة.

اذا كان الرقم موحد يعني بين ٢ وال ٣ مثلا , معناها هي القصة ماعليها مشكلة وباتفاق الجميع هي نسبة صعوبتها.

المشكلة وقت بيكون في فرق شاسع بالتقييم بالقصة, هي بتعطي مؤشر ,لشغلتين, اما القصة مو واضحة لذلك كل شخص عبقيمها شكل او انو المبرمج بيعرف شي مابيعرفو باقي الفريق وقتها يلي مقيم اقل شي بيشرح ليش هو قيمها بشكل قليل , ممكن يكون لانو في مكتبة جاهزة بيعرفها, او لانو في تيكيت مماثلة. ونفس السؤال بينطرح على يلي قيم اعلى تقييم , ممكن يكون شايف صعوبة ماحدا غيرو شايفها , ويحاول يوصلها للفريق.

الهدف من جلسات البوكر مو هو انو واحد يطلع بيعرف يقيم والباقي لا, الهدف هو انو يتوحد مستوى المعرفة والتقييم عند الفريق وانو الفريق يشتغل ككيان موحد مو كل شخص لحالو

معظم المشاكل بتقييم البوكر بتكون لانو الفريق جديد او المشروع جديد, بعد فترة من العمل مع الفريق بيلاحظ مالك المشروع انو معظم القصص عبيتم تقييمها من الفريق بشكل متناغم

جلسة ال Backlog Refinement بتصير كل اسبوع او اسبوعين او حسب عدد القصص الموجودة بال Backlog الهدف من هي الجلسة انو يكون في عدد قصص كبير تم تقييمو

طيب بعد ماتم تقييم نسبة صعوبة القصة, كيف بيحدد مالك المشروع كم قصة بيحسن ياخد للسبرينت؟ هاد الشي منحكي عنو بالموضوع القادم ان شاء الله 🙂

لميس

إسمي لميس, اعمل كمهندسة برمجيات في شركة إكسينغ في ألمانيا. بدأت في رحلة العمل في المجال البرمجي منذ أكثر من ١٠ سنوات في سنة ٢٠٠٣ كانت بداية رحلتي المهنية حيث كانت بدايتي مع ألعاب الفلاش.. حالياََ انا استخدم العديد من الأدوات البرمجية في العمل فنحن بحاجة ماسة للإطلاع على احدث التقنيات. هدفي هو نقل ما أتعلمه للمشاركة به وتبادل الخبرات مع الجميع

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *